26.06.2021, ԳԼԵՆԴԵԼ
Լոս Անժելեսում ուղեղի կաթվածից կյանքից հեռացել է շոումեն Գևորգ Եղիազարյանը։ Լուրը Yerevan.Online-ին հայտնեցին շոու-բիզնեսի մեր աղբյուրենը։
Դերասանի մասնագիտությամբ Եղիազարյանը 2000-ականների լոտոների բումի շրջանում հայտնի դարձավ իբրև «Ընտանեկան լոտոյի» հաղորդավար, ակտիվ զբաղվում էր հանդիսավարությամբ։
2011-ից բնակվում էր ԱՄՆ-ում։ Հարցին՝ ինչո՞վ է Ամերիկայի Միացյալ Նահանգներն այդքան գրավում հայ հայտնիներին, պատասխանում էր.
- Չգիտեմ այլոց ինչով, բայց ինձ լայն, մեծ ու անսահմանափակ հնարավորություններով: Այստեղ ես իմ կամքին հակառակ պարտավորություններ չունեմ, ընտրելու իրավունք ունեմ, իսկ ընտրության հնարավորությունը շատ մեծ է: Ասեմ նաև, որ ոչ միայն հայտնիներին է գրավում ԱՄՆ-ն, այլ շատ-շատերին: Մենք երկու միլիոնից ավել հայ ազգաբնակչություն ունենք այստեղ, ուղղակի հայտնիների քայլերն ավելի տեսանելի են:
Գևորգը մասնագիտությամբ դերասան էր, սակայն այդ ոլորտում այնքան էլ ակտիվություն չէր ցուցաբերում: Ինչո՞ւ նրան չգրավեց դերասանի կարգավիճակը հարցին ասում էր.
- Շնորհիվ մի քանի հետաքրքիր առիթների` կարողացա ներկայանալ իմ բուն մասնագիտությամբ, որն է դրամատիկ կինոյի և թատրոնի դերասան: Սակայն հաղորդավարությունը ևս հեռու չէ իմ մասնագիտությունից, չէ՞ որ այստեղ ևս պահանջվում է խոսքի կուլտուրա և ճիշտ առոգանություն, ինչն այսօր շատ է կաղում մեր հայկական հեռուստաեթերում:
Գևորգ Եղիազարյանը նաև բանաստեղծություններ էր գրում։ Ձեզ ենք ներկայացնում նրա ստեղծագործություններից մեկը.
ՓՈԽՎԵԼ Է ԻՄ ՇՈՒՐՋԸ ԱՄԵՆ ԻՆՉ,
ԿԱՐԾԵՍ, ԷԼ ԱՌԱՋՎԱՆԸ ՉԷ ՈՉԻՆՉ:
ԻՄ ՀԱՐԱԶԱՏ ԴՊՐՈՑԻ ԿՈՂՔՈՎ ՔԱՅԼԵԼԻՍ,
ՍԻՐՏՍ ՉԻ ԶԱՐԿՈՒՄ, ԷԼ ՉԵՄ ՇՏԱՊՈՒՄ,
ՈՒՍՈՒՑՉՈՒՀՈՒՍ ՏԵՍՆԵԼԻՍ, ԷԼ ՉԵՄ ԿԱՐԿԱՄՈՒՄ,
ԻՍԿ ԴՊՐՈՑԱԿԱՆ ՆՍՏԱՐԱՆԻՆ ՆՍՏԵԼԻՍ, ՉԵՄ ՏԵՂԱՎՈՐՎՈՒՄ:
ՓՈԽՎԵԼ Է ԻՄ ՇՈՒՐՋԸ ԱՄԵՆ ԻՆՉ....
ԻՆՁ ԾԱՆՈԹ ՈՒ ՀԱՃԵԼԻ ՓՈՂՈՑՆԵՐՈՎ ՔԱՅԼԵԼԻՍ,
ԳԱՐՆԱՆ ԱՆՈՒՇ ԱԿԱՑԻԱՅԻ ԲՈՒՐՄՈՒՆՔԸ ՉԻ ԳԱԼԻՍ,
ՔԱՂՑՐԱՎԱՃԱՌ ՏԻԿԻՆԸ, ԷԼ ՁԱՅՆ ՉԻ ՏԱԼԻՍ,
ԱՅՍ ԱՄԵՆԻ ԿԱՐՈՏԻՑ, ՍԻՐՏՍ Է ԼԱԼԻՍ:
ՓՈԽՎԵԼ Է ԻՄ ՇՈՒՐՋԸ ԱՄԵՆ ԻՆՉ....
ԸՆԿԵՐՆԵՐԻՍ ԱՉՔԵՐԻՆ ՆԱՅԵԼԻՍ,
ԱՌԱՋՎԱ ՊԵՍ ՓԱՅԼՈՒՆ ՇՈՂԵՐ ՉԵՆ ՏԱԼԻՍ,
ԾԻԾԱՂԻՑ ԹՈՒԼԱՑԱՑ, ՈՒՐԱԽՈՒԹՅԱՆ ԱՐՑՈՒՆՔՆԵՐԸ ՉԵՆ ԳԱԼԻՍ,
ՏԱՐԵՑ ՄԱՐԴԻԿ ԻՆՁ ՏԵՍՆՈՒՄ,ԲԱՅՑ ԷԼ ԲԱՐԵՎ ՉԵՆ ՏԱԼԻՍ:
ՓՈԽՎԵԼ Է ԻՄ ՇՈՒՐՋԸ ԱՄԵՆ ԻՆՉ....
ԵՐԿԱՐ ՍՊԱՍՎԱՑ ԳԱՐՈՒՆԸ, ԱՌԱՋՎԱ ՊԵՍ ՉԻ ԳԱԼԻՍ,
ՃԱՄՓԻՆ ՓՌՎԱԾ ՎԱՐԴԵՐԸ, ՀԻՆ ԲՈՒՐՄՈՒՆՔԸ ՉԵՆ ՏԱԼԻՍ,
ԻՆՁ ԱՐԹՆԱՑՆՈՂ ԱՌԱՎՈՏՎԱ ԱՐԵՎԻ ՇՈՂԸ,
ԱՉՔՍ ՉԻ ԾԱԿՈՒՄ, ՇԱՏ ՈՒՇ Է ՄԵՐ ՏՈՒՆ ԳԱԼԻՍ:
ՓՈԽՎԵԼ Է ԻՄ ՇՈՒՐՋԸ ԱՄԵՆ ԻՆՉ....
ԽՈՀԵՄ ՀՈՐՍ ՄԱԶԵՐԸ,
ԱՌԱՋՎԱ ՊԵՍ, ՍԵՎ ԱԼԻՔՆԵՐ ՉԵՆ ՏԱԼԻՍ,
ԻՍԿ ԻՄ ՔՆՔՈՒՇ, ՆՈՒՐԲ ՄԱՅՐԻԿԻՆ,
ԻՆՉ ՈՐ ՄԵԿԸ՝ ՏԱՏԻԿ ԱՆՈՒՆՆ Է ՏԱԼԻՍ:
ՓՈԽՎԵԼ Է ԻՄ ՇՈՒՐՋԸ ԱՄԵՆ ԻՆՉ....
ԱՄԵՆ ԹԵԹԵՎ ՄՏՔԻ ՎՐԱ ԷԼ ՉԵՄ ԾԻԾԱՂՈՒՄ,
ԱՄԵՆ ՍՏԱՑԱԾ ՆՎԵՐԻՑ, ՉԵՄ ԵՐՋԱՆԿԱՆՈՒՄ,
ԱՄԵՆ ՄԵԿՆԱԾ ՁԵՌՔ, ԵՍ ԷԼ ՉԵՄ ՍԵՂՄՈՒՄ,
ԱՄԵՆ ԱՍՎԱԾ ՔԱՂՑՐ ԽՈՍՔՈՎ, ԷԼ ԵՍ ՉԵՄ ՏԱՐՎՈՒՄ:
ՓՈԽՎԵԼ Է ԻՄ ՇՈՒՐՋԸ ԱՄԵՆ ԻՆՉ....
ՈՒՇ ԵՄ ՔՆՈՒՄ.....ՎԱՂ ԱՐԹՆԱՆՈՒՄ....
ԽՈՐՐՀՈՒՐԴ ԵՄ ՏԱԼԻՍ, ՈՒ ՈՉ ԹԵ ԱՌՆՈՒՄ:
ՓՈԽՎԵԼ Է ԻՄ ՇՈՒՐՋԸ ԱՄԵՆ ԻՆՉ....
ՄԵԾԱՑԵԼ ԵՄ ԳՈՒՑԵ... ՄԻ ՔԻՉ...
