Հնդկական մամուլը հայտնում է, որ Հայաստանը հնդկական զենքի մեծ խմբաքանակ է ստացել Իրանի տարածքով

Pinaka Mk-1-ը հատկապես արդյունավետ է ԱԹՍ-ների դեմ պայքարում

28.07.2023

Հնդկաստանը սկսել է Հայաստանին զենք մատակարարել Իրանի տարածքով, հայտնում է հնդկական The Economic Times-ը՝ նշելով անցյալ տարի Դելիում ստորագրված պայմանագրերը:

Դրանք ենթադրում են հրթիռային համակարգերի, բուն հրթիռների և հրետանային կայանքների տրամադրում Հայաստանին:

Իրանի և Հայաստանի հետ Հնդկաստանի համագործակցությունը դուրս է գալիս զենքի մատակարարումների շրջանակից. այն ներառում է եռակողմ աշխատանքային խումբ, որն ուսումնասիրում է նոր միջազգային տրանսպորտային միջանցքի հնարավորությունը: Ավելին, Նյու Դելին և Երևանը բանակցություններ են վարում համատեղ տնտեսական նախագծերի շուրջ։ Հայաստանն առաջարկել է Իրանի տարածքով Պարսից ծոց-Սև ծով միջանցք ստեղծել՝ Հյուսիս-Հարավ ավտոմայրուղուն զուգահեռ՝ հեշտացնելու հնդիկների կապը Ռուսաստանի և Եվրոպայի հետ:

Հնդկաստանի ռազմաօդային ուժերի թոշակի անցած օդաչու և ռազմական փորձագետ Վիժանդեր Թակուրը պնդում է, որ Pinak բազմակի հրթիռային կայաններ ուղարկելը Հայաստան նշանակալի իրադարձություն է Հնդկաստանի ռազմարդյունաբերական համալիրի համար, որը հեռահար նպատակ ունի դառնալ զենքի խոշոր արտահանող: Առաքման համար ընտրվել է Pinaka Mk-1 տարբերակը, թեև գոյություն ունեն տեխնոլոգիապես ավելի զարգացած Mk-2 կամ Mk-3 համակարգեր: Արտադրական հզորությունը թույլ է տալիս Հնդկաստանին արտահանել Pinaka Mk-1-ը` չվնասելով իր պաշտպանական միջոցները:

Pinaka Mk-1 արձակման կայանների նկատմամբ Հայաստանի նախապատվությունը կարելի է վերագրել դրանց շարժունակությանը, որը չափազանց կարևոր է անօդաչու թռչող սարքերով հագեցած մարտադաշտերում:

Բացի այդ, համակարգի մատչելիությունը և հայկական բանակի ծանոթությունը խորհրդային «Գրադ» համակարգին ավելի են արդարացնում որոշումը: Ստեղծված արտադրական հզորությունը Հայաստանին ապահովում է զինամթերքի և պահեստամասերի անխափան մատակարարում։