28.02.2025
ԴՕԿ կուսակցությունը նախօրեին հայտարարություն էր տարածել՝ տեղեկացնելով, որ փետրվարի 21-ից հետո չի հաջողվել կապ հաստատել իր հիմնադիր նախագահ Վարդան Ղուկասյանի հետ։
Այսօր նրա աջակիցները բողոքի ցույց են կազմակերպել ԱՄՆ դեսպանատան դիմաց՝ պահանջելով հստակ տեղեկատվություն նրա գտնվելու վայրի մասին։
Պարզվել է, որ Վարդան Ղուկասյանը ձերբակալվել է և ներկայումս գտնվում է Լաս Վեգասի Հենդերսոնի ձերբակալվածների պահման կենտրոնում (Henderson Detention Center)։
Նրա ձերբակալման մասին տվյալները հայտնաբերվել են ԱՄՆ Միգրացիոն և մաքսային ոստիկանության (ICE) որոնման համակարգում, որը հնարավորություն է տալիս հետևել ձերբակալված անձանց կարգավիճակին։
Ղուկասյանի ձերբակալությունը տեղի է ունեցել ԱՄՆ-ում միգրացիոն քաղաքականության խստացման ֆոնին։ Վերջին շրջանում, Դոնալդ Թրամփի նախաձեռնած պայքարի շրջանակներում, հազարավոր միգրանտներ արդեն ձերբակալվել և արտաքսվել են երկրից։
Հատկանշական է, որ Վարդան Ղուկասյանը նախկինում բազմիցս հրապարակային աջակցություն է հայտնել ինչպես Թրամփի քաղաքականությանը, այնպես էլ Իլոն Մասկի որոշումներին։ Այնուամենայնիվ, նրա հնարավոր արտաքսման վերաբերյալ պաշտոնական տեղեկատվություն դեռևս չկա։
